Osmanlıca

أى نفس! أگر تقوا و عملِ صالح ايله خالقڭى راضى ايتدى ايسه‌ڭ، خلقڭ رضاسنى تحصيله لزوم يوقدر· او كافيدر. أگر خلق ده اللّٰهڭ حسابنه رضا و محبّت گوستررلرسه، اييدر.

(رسالهِٔ نوركلّياتندن)

قرآن، إسمِ أعظمدن و هر إسمڭ أعظملق مرتبه‌سندن گلمش. هم بتون عالملرڭ ربّى إعتباريله اللّٰهڭ كلاميدر. هم بتون موجوداتڭ إلٰهى عنوانيله اللّٰهڭ فرمانيدر. هم سماوات و أرضڭ خالقى حيثيتيله بر خطابدر.

(رسالهِٔ نوركلّياتندن)

بنمله گوروشن أكثرى دوستلردن، كندى عائله‌وى حياتلرندن شكوالر ايشيتدم. "أيواه!" ديدم. إنسانڭ خصوصًا مسلمانڭ تحصّنگاهى و بر نوع جنّتى و كوچك بر دنياسى عائله حياتيدر. بو ده مى بوزولمغه باشلامش ديدم.

(رسالهِٔ نوركلّياتندن)

قرآن، قلوبه قوت و غدا و عقوله قوّت و غنادر و روحه ماء و ضيا و نفوسه دواء و شفاء اولديغندن اوصانديرماز.

(رسالهِٔ نوركلّياتندن)

أوت جنابِ حقّه ايمان ايدن، ألبته اوڭا إطاعت ايده‌جك. و إطاعت يوللرى ايچنده أڭ مقبولى و أڭ مستقيمى و أڭ قيصه‌سى، بِلا شبهه حبيب اللّٰهڭ گوسترديگى و تعقيب ايتديگى يولدر.

(رسالهِٔ نوركلّياتندن)

أى قارداشلرم! دقّت ايديڭز: وظيفه‌ڭز قدسيه‌در، خدمتڭز علويدر. هر بر ساعتڭز، بر گون عبادت حكمنه گچه‌بيله‌جك بر قيمتده‌در. بيليڭز كه، ألڭزدن قاچماسين!

(رسالهِٔ نوركلّياتندن)

مال ايسترسه‌ڭ قناعت يتر. أوت قناعت ايدن، إقتصاد ايدر· إقتصاد ايدن، بركت بولور.

(رسالهِٔ نوركلّياتندن)

كيمڭ ايچون اللّٰه وار، اوڭا هر شى وار و كيمڭ ايچون يوقسه، هر شى اوڭا يوقدر، هيچدر.

(رسالهِٔ نوركلّياتندن)

نماز قيلانڭ ديگر مباح دنيوى عمللرى، گوزل بر نيّت ايله عبادت حكمنى آلير. بو صورتده بتون سرمايهِٔ عمرينى، آخرته مال ايده‌بيلير. فانى عمرينى، بر جهتده إبقا ايدر.

(رسالهِٔ نوركلّياتندن)

بر شهر، بر ولايت، بر مملكت، بلكه كُرهِٔ أرض، بلكه دنيا، بلكه عالمِ وجود ايكى حقيقى دوست ايچون بر مجلس حكمنده‌در. بويله دوستلق و قارداشلغڭ فراقى يوق، هپ وصالدر. فانى، مجازى، دنيوى دوستلقلر صاحبلرى فراقى دوشونسون، بزه نه؟

(رسالهِٔ نوركلّياتندن)

مدارِ نجات و خلاص، يالڭز إخلاصدر. إخلاصى قزانمق چوق مهمدر. بر ذرّه إخلاصلى عمل، بطمانلرله خالص اولميانه مرجّحدر.

(رسالهِٔ نوركلّياتندن)

لَا اِلٰهَ اِلَّا اَنْتَ سُبْحَانَكَ اِنِّى كُنْتُ مِنَ الظَّالِمِينَ
ديمه‌لىيز و عين اليقين آڭلاملىيز كه: غفلت و ضلالتمز سببيله عليهمزه إتّفاق ايدن إستقبال، دنيا و هواىِ نفسڭ ضررلرينى دفع ايده‌جك يالڭز او ذات اولابيلير كه· إستقبال تحتِ أمرنده، دنيا تحتِ حكمنده، نفسمز تحتِ اداره‌سنده‌در.

(رسالهِٔ نوركلّياتندن)

أى إنسان و أى مصيبتزده بنى آدم! مأيوس اولمايڭز. هر درد، (نه اولورسه اولسون) درمانى ممكندر. آرايڭز، بولڭز.

(رسالهِٔ نوركلّياتندن)

زكات، هر شخص ايچون سببِ بركت و دافعِ بليّاتدر. زكاتى ويرميه‌نڭ هر حالده ألندن زكات قدر بر مال چيقه‌جق· يا لزومسز يرلره ويره‌جكدر، يا بر مصيبت گلوب آلاجقدر.

(رسالهِٔ نوركلّياتندن)

مصيبتلر، درگاهِ إلٰهىيه سَوق ايتمك ايچون برر قدر قامچيسيدر. أڭ بيوك سعادتلر بيوك و آجى فلاكتلرڭ نتيجه‌سيدر.
(رسالهِٔ نوركلّياتندن)

عابد، نمازنده دير: ﴿اَشْهَدُ اَنْ لَا اِلٰهَ اِلَّا اللّٰهُ﴾ يعنى: "خالق و رزّاق، اوندن باشقه يوقدر. ضرر و منفعت، اونڭ ألنده‌در. او هم حكيمدر، عبث ايش ياپماز. هم رحيمدر· إحسانى، مرحمتى چوقدر." دييه إعتقاد ايتديگندن هر شيده بر خزينهِٔ رحمت قپوسنى بولور. دعا ايله چالار.

(رسالهِٔ نوركلّياتندن)

أحسنِ تقويم صورتنده ياراديلان إنسان، حياتِ دنيويه‌يه حصرِ فكر ايتسه· يوز درجه سرمايه‌جه حيواندن يوكسك اولديغى حالده، يوز درجه سرچه قوشى گبى بر حيواندن آشاغى دوشر.
(رسالهِٔ نوركلّياتندن)

بو ميدانِ إمتحانده اولانلر، باشى بوش دگللر· سعادت سرايلرى و زندانلر اونلرى بكله‌يورلر.
(رسالهِٔ نوركلّياتندن)

أى صبرسز نفسم! سن اوچ صبر ايله مكلّفسڭ. بريسى: طاعت اوستنده صبردر. بريسى: معصيتدن صبردر. ديگرى: مصيبته قارشى صبردر.

(رسالهِٔ نوركلّياتندن)

لا يموت دگلسڭ، باشى بوش دگلسڭ، بر وظيفه‌ڭ وار. غرورى بيراق، سنى يارادانى دوشون، قبره گيده‌جگڭى بيل، اويله حاضرلان.

(رسالهِٔ نوركلّياتندن)

إعلم أيّها العزيز! تفكّر، غفلتى إزاله ايدر.

(رسالهِٔ نوركلّياتندن)

بز قرآنى كنديمزه دستور سچدك. بزم غايه‌مز: ذوقى، اللّٰهڭ يولنده آرامق و إسلاميتى بتون دنيايه يايمقدر

(رسالهِٔ نوركلّياتندن)

گنجلك نعمتنه بر شكر اولارق، او طاتلى نعمتى عفّتده، إستقامتده صرف ايتمك لازم و ألزمدر.

(رسالهِٔ نوركلّياتندن)

گورويورم كه: شو دنيا حياتنده أڭ بختيار اودر كه: دنيايى بر مسافرخانهِٔ عسكرى تلقّى ايتسين و اويله ده إذعان ايتسين و اوڭا گوره حركت ايتسين. و او تلقّى ايله، أڭ بيوك مرتبه اولان مرتبهِٔ رضايى چابوق ألده ايده‌بيلير.

(رسالهِٔ نوركلّياتندن)